„Запрете ја грчката кампања на дезинформации“ - гласи глобалната иницијатива на македонската обединета дијаспора во пресрет на средбата меѓу американската државна секретарка Кондолиза Рајс и грчката министерка за надворешни работи Дора Бакојани на 14-ти февруари во Вашингтон. Со илјадници електронски пораки пратени преку интернет, македонската дијаспора стартува со акција Македонците да и пишат на Рајс барајќи таа на Бакојани да и ја повтори позицијата на Вашингтон – дека САД го признале уставното име на Република Македонија, дека го поддржуваат влезот на земјава во НАТО и дека прашањето за името не е критериум за членство во алијансата.

 

Во писмата пратени од македонската дијаспора постои можност директно само со едно „кликање“ веднаш да се поврзете на веб - сајтот на Стејт Департментот, каде во делот насловен како тема го избирате државниот секретар. Писмото што ќе го напишете ќе биде пратено до кабинетот на Кондолиза Рајс. Другата опција е да го преземете веќе напишаното писмо од македонската дијаспора и во ваше име да и го пратите на државната секретарка. Суштината на текстот е дека една земја не може на друга да и го оспори правото на име и на идентитет, дека Македонија покажала голема конструктивност за решавање на прашањето преку промена на државното знаме и уставот и дека името не треба да биде услов за покана на Македонија на букурешкиот самит на НАТО. Средбата Рајс - Бакојани е на грчко барање и е обид на Атина пред самитот во Букурешт да го смени ставот на Вашингтон за прашањето за името, кој смета дека Грција нема право да го блокира приемот на Македонија во НАТО под привременото име.